Kанферэнцыi

Інстытут палітычных даследаванняў «Палітычная сфера» абвяшчае даты і месца правядзення VIII  Міжнароднага Кангрэса даследчыкаў Беларусі. Галоўная беларуская акадэмічная падзея адбудзецца 27-29 верасня 2019 года ў Вільні. Асноўным акадэмічным партнёрам Кангрэса выступіць Еўрапейскі гуманітарны ўніверсітэт (ЕГУ).

 Традыцыйна на Кангрэс збяруцца звыш 500 навукоўцаў і экспертаў з Беларусі і замежжа, чакаюцца дыскусіі і прэзентацыі, а таксама наданне Прэміі за найлепшыя навуковыя публікацыі і студэнцкія працы па вынікам 2018 года.

Дырэктар Інстытута «Палітычная сфера» д–р Андрэй Казакевіч адзначае: «Рады запрасіць даследчыкаў, партнёраў і гасцей з усяго свету на 8-мы Міжнародны кангрэс даследчыкаў Беларусі ў Вільню. Гэта ўнікальная магчымасць далучыцца да самай вялікай навуковай і экспертнай падзеі, прысвечанай Беларусі, і прадставіць вынікі сваёй працы сотням беларускіх і замежных удзельнкаў. Дзякуючы партнёрству з нацыянальнымі, рэгіянальнымі і глабальнымі асяродкамі, Кангрэс прадстаўляе выдатную магчымасць для ўсталявання новых прафесійных сувязяў, абмеркавання праектаў, абмену ідэямі і досведам».

Па словах Рэктара ЕГУ праф. Сяргея Ігнатава: «Супольнасць ЕГУ усцешана тым, што наш універсітэт выступіць асноўным акадэмічным партнёрам VIII Кангрэса даследчыкаў Беларусі. Новы корпус ЕГУ, які месціцца ў будынку былога Аўгустынскага кляштара ў Вільні, будзе рады прыняць навукоўцаў, якія займаюцца даследаваннямі Беларусі і ўсяго рэгіёна. Мы ўпэўненыя, што дзякуючы незалежным даследаванням ў сацыяльных і гуманітарных навуках ды мастацтвах адбываецца інтэграцыя Беларусі ў еўрапейскую інтэлектуальную прастору».

Акадэмічнымі партнёрамі таксама выступяць Універсітэт Вітаўта Вялікага, Інстытут Вялікага Княства Літоўскага і шэраг іншых акадэмічных устаноў. Плануецца, што частка імпрэз Кангрэса адбудуцца ў Ратушы і іншых месцах Старога горада Вільні. Партнёрам Кангрэса з’яўляецца Міністэрства замежных спраў Літоўскай Рэспублікі.

Першы Міжнародны кангрэс даследчыкаў Беларусі адбыўся ў 2011 годзе. З 2011 па 2016 гады Кангрэс праходзіў у Коўне, у 2017 годзе — у Варшаве. У 2018 па тэхнічных прычынах Кангрэс не змог адбыцца ў Мінску, і было прынята рашэнне пра перанос 8-ага Кангрэса на 2019 год.

Папярэдні план падрыхтоўкі Кангрэса

1.     Збор заявак на стварэнне секцый і панэляў – да 5 сакавіка 2019 года. Збор заявак адкрываецца 10 студзеня.

2.     Збор намінацый на прэмію кангрэса – да 10 красавіка 2019 года. Збор заявак адкрываецца 10 лютага.

3.     Дэдлайн для збора індывідуальных заявак – да 20 траўня 2019 года. Збор заявак адкрываецца 20 сакавіка.

4.     Размеркаванне субсідый на пражыванне і транспарт – да 5 чэрвеня 2019 года.

5.     Вызначэнне фінальнага спісу секцый на падставе збору індывідуальных заявак – 10 чэрвеня 2019 года.

6.     Рассылка індывідуальных запрашэнняў – да 25 чэрвеня 2019 года. Да 10 ліпеня ўдзельнікі мусяць пацвердзіць свой удзел.

7.     Папярэдняя праграма кангрэса — 5 жніўня 2019 года.

 Сайт: http://icbs.palityka.org

Пошта: icbs@palityka.org

 Кантактныя асобы для медыя:

д-р Андрэй Казакевіч, інстытут «Палітычная сфера», kazakevich@palityka.org

Максімас Мілта, Еўрапейскі гуманітарны ўніверсітэт, [email protected]

Праграма.

Літва і Беларусь – гэта не толькі краіны-суседзі. Народы гэтых дзяржаў, акрамя гісторыі, якая сягае сваімі каранямі ў старажытныя часы, аб’ядноўваюць шырокамаштабныя эканамічныя і культурныя сувязі. Літоўцы жывуць у Беларусі, і беларусы пражываюць у Літве. Асаблівую сувязь паміж краінамі пацвярджаюць супольныя народныя сімвалы, такія як гістарычная сталіца Вялікага Княства Літоўскага – Вільня. Жыхарам гэтых краін дарагія агульныя гістарычныя асобы: вялікі князь Вітаўт (Вітаўтас), князі Радзівілы, Касцюшка, Каліноўскі і многія іншыя. Многае паказвае, што грамадскія і міждзяржаўныя адносіны мусяць быць выдатнымі, але гэта не так.

Існуюць рознагалоссі з нагоды будаўніцтва беларускай АЭС у Астраўцы. Шмат хто ў Літве занепакоеныя пытаннем: ці ўдасца Беларусі захаваць сваю дзяржаву? Большасць літоўцаў крытычна ставяцца да палітычнага ладу Беларусі. У Беларусі, у сваю чаргу, многія насцярожана ўспрымаюць еўраатлантычную інтэграцыю Літвы, яе актыўную знешнепалітычную пазіцыю ў рэгіёне. Гэтыя вельмі складаныя пытанні ўплываюць на адносіны паміж краінамі, і наўрад ці палітыкам з абодвух бакоў удасца канчаткова дамовіцца.

На жаль, існуючыя праблемы сталі дамінаваць у двухбаковых стасунках. Акрамя іншага, шмат недамоўленасцяў узнікае па гістарычных тэмах, якія, на першы погляд, павінны аб’ядноўваць нацыі. Усё гэта не толькі ўскладняе палітычныя адносіны, але і перашкаджае развіццю сувязяў паміж інтэлектуаламі, дзеячамі культуры, бізнэсу і навукі.

Так не павінна быць. Не забываючы існуючых праблем, мы павінны імкнуцца шукаць пункты судакранання па агульных для нас пытаннях і праблемах. Пачатак дыялогу і наладжванне супрацоўніцтва на будучыню з’яўляецца галоўнай мэтай першага Грамадскага літоўска-беларускага форуму.

Місія форуму – пашырэнне нефармальнага, грамадзянскага дыялогу паміж Беларуссю і Літвой з мэтай абмеркавання перспектыў і праблем міждзяржаўнага супрацоўніцтва, паглыбленне ўзаемаразумення і павагі паміж краінамі ды народамі Літвы і Беларусі.

Арганізатарамі форуму выступаюць муніцыпалітэт горада Клайпеда, Клайпедскі ўніверсітэт, а таксама шэраг грамадскіх арганізацый і ініцыятыў: Форум дыялогу і супрацоўніцтва імя Ежы Гедройца, Інстытут Вялікага Княства Літоўскага, Інстытут “Палітычная сфера“.

Сайт форума

Праграма

20-21 чэрвеня 2018 года ў Літоўскай нацыянальнай бібліятэцы імя Мажвідаса (Вільня, пр. Гедыміна 51) адбылася міжнародная канферэнцыя “1918 год ў Літве і Польшчы з перспектывы сучаснай Цэнтральна-Усходняй Еўропы: гісторыя, палітыка і культура”, прысвечаная стагоддзю адраджэння дзяржаўнасці Літвы і Польшчы.

Канферэнцыя ставіла задачу абмеркаванне шляхоў атрымання незалежнасці Літвой і Польшчай, а таксама іншымі краінамі Цэнтральна-Усходняй Еўропы, прэзентацыю найшоўшых даследаванняў развіцця польскага і літоўскага нацыянальнага адраджэння пачатку ХХ стагоддзя і поглядаў на палітычную традыцыю Літвы і Польшчы. Акрамя гістарычных тэм, выступоўцы таксама прынялі ўдзел у абмеркаванні праблем сучаснага свету: парадыгмы актуальнай знешняй палітыкі Літвы і Польшчы, месца гэтых краін у Еўропе і свеце.

Удзел у канферэнцыі прынялі гісторыкі, палітолагі, сацыёлагі, культуролагі, філолагі і прадстаўнікі іншых дысцыплін, якія падзяліліся вынікамі сваіх даследаванняў па гісторыі, палітыкі ды культуры Літвы, Польшчы і іншых краін у кантэксце стагоддзя дзяржаўнасці. З дакладамі выступілі навукоўцы з Польшчы, Літвы, Украіны, Чэхіі, ЗША і іншых краін.

Канферэнцыю арганізаваў Варшаўскі універсітэт у супрацоўніцтве з Універсітэтам Вітаўта Вялікага, Універсітэтам Міхала Ромера, амбасадай Польшчы ў Вільне, Інстытутам Вялікага Княства Літоўскага, а таксама Літоўскай нацыянальнай бібліятэкай імя Марціна Мажвідаса.

Program.

Sections.

1918 год змяніў увесь рэгіён Усходняй Еўропы. Руйнаваліся імперыі і паўставалі новыя дзяржавы, перакройваліся межы і кансалідаваліся нацыі. Ідэя суверэнітэту і незалежнасці набывала палітычнае ўвасабленне. Для адных нацый больш паспяховае (Літва, Латвія, Польшча), для іншых – менш (Беларуская Народная Рэспубліка, Украінская Народная Рэспубліка).  Дыскусіі пра суверэнітэт на гэтым, аднак не спыніліся, яны заставаліся важнымі ўсё ХХ стагоддзе, былі ўзнятыя на новы ўзровень з распадам сацыялістычнага блоку і СССР (1990-1991) і зноў набылі актуальнасць пасля пашырэння ЕС у 2004 годзе. Ва ўмовах новых выклікаў бяспецы і міру ва Усходняй Еўропе з пачаткам у 2014 годзе украінска-расійскага канфлікту, абвастрэннем стасункаў Расіі з ЕС і ЗША, праблемы суверэнітэту, яго межаў і трываласці, зноў патрапляюць у цэнтр увагі.

Першы дзень канферэнцыі. 18 траўня
Месца правядзення: Пасольства Літоўскай Рэспублікі ў Беларусі (вул. Захарава, 68).

9.00-10.00. Рэгістрацыя
10.00-10.15. Адкрыццё канферэнцыі. Прамовы арганізатараў.

10.15-12.00. Пленарнае паседжанне.
Павэл Коваль (Польшча). 1991 год для Польшчы, Украіны, Літвы і Беларусі: паміж амбіцыямі і магчымасцямі дзеяння
Алгімантас Каспаравічус (Літва). Імперская спадчына: праблемы літоўскай палітычнай думкі і рэалізацыі нацыянальнага суверэнітэта (1914-22)
Дарыюш Тарасюк (Польшча). Стаўленне беларускіх палякаў да ідэі незалежнасці Польшчы (1905-1918)

12.00-12.20 Кава-паўза

12.20-14.00. Панэль І. Перабудова, распад СССР і паўставанне новых дзяржаў, 1988-1991
Валер Карбалевіч (Беларусь). Чаму распаўся СССР?
Андрэй Казакевіч (Беларусь). “За” і “супраць” Саюзу. Параўнанне дзейнасці прасавецкіх і незалежніцкіх арганізацый у заходніх рэспубліках СССР, 1988-1991
Алег Дзярновіч (Беларусь). “Гістарычны рэсурс” у часы Перабудовы ў Беларусі (1988—1991 гады)

14.00-15.00 Абед

15.00-16.15. Панэль ІІ. Паўставанне нацыянальных дзяржаў у Цэнтральна-Усходняй Еўропе ў міжваенны час
Павел Церашковіч (Беларусь). Сацыяльныя рэсурсы нацыянальных рухаў ва Ўсходняй Еўропе і пабудова нацыянальных дзяржаў
Яцэк Стасёрчык (Польшча). Дэнацыяналізацыя ці ахова ідэнтычнасці? Становішча польскамоўнай асветы ў Літоўскай рэспубліцы ў 1918-40 гадах
Варвара Кухарэнка (Беларусь). Стварэнне Дзяржавы славенцаў, харватаў і сербаў: рэалізацыя прэчанскіх спадзяванняў ці прасербскі праект

16.15-17.30. Панэль ІІІ. Праблемы суверэнітэту
Патрык Тамашэўскі (Польшча). Незалежная Беларусь, Малдова і Грузія ў польскай палітычнай думцы пасля 2004 года: параўнаўчы падыход
Ігар Случак (Беларусь). Моўная палітыка на акупаванай тэрыторыі Беларусі ў 1941-44 гг.
Аляксей Крывалап (Беларусь). Нацыянальны суверэнітэт у медыйным вымярэнні

18.30 – 20.30. Публічная дыскусія “БНР і БССР”

Другі дзень канферэнцыі. 19 траўня.
Месца правядзення: Пасольства Літоўскай Рэспублікі ў Беларусі (вул. Захарава, 68).

10.00-11.30 Панэль IV. БНР: культурная памяць і рэпрэзентацыя (1)
Наталля Гардзіенка (Беларусь). Мемарыялізацыя БНР як частка канструявання (захавання) нацыянальнай ідэнтычнасці беларускай паваеннай эміграцыі
Ксенія Шталенкова (Беларусь). Рэпрэзентацыя права на беларускае самавызначэнне ў дызайне грашовых знакаў 1917-1924 гг.
Радзівон Попель (Беларусь). Беларускі нацыянальны рух, БНР і рэлігія: погляд праз стагоддзе

11.30-12.00. Кава-паўза

12.00-13.00 Панэль IV. БНР: культурная памяць і рэпрэзентацыя (2)
Сяргей Емельянаў (Беларусь). “Міф заснавання дзяржавы” ў школьных падручніках Беларусі, Расіі і Ўкраіны.
Аляксей Ластоўскі (Беларусь). Забыты юбілей: адзначэнне стогоддзя Кастрычніцкай рэвалюцыі ў Беларусі

Aрганізатары

Інстытут “Палітычная сфера” (Беларусь-Літва)
Амбасада Літоўскай Рэспублікі ў Беларусі
Польскі Інстытут у Мінску
Беларускі Калегіум
Інстытут ВКЛ (Літва)
Універсітэт Вітаўта Вялікага (Літва)
Інстытут гісторыі Літвы

З нагоды сямідзесяцігоддзя прафесара Юратэ Кяўпене. Каўнас 1 снежня 2017. Праграма.