Узгадваючы Дзень Канстытуцыі Рэч Паспалітай абодзьвух народаў, Клуб
“Вольных стралкоў ковенскага павета” ў супрацоўніцтве з Інстытутам
Вялікага Княства Літоўскага 2 мая 2014 г. распачаў цыкл “Гістарычных
цырымоній у Ковенскім старым горадзе”. Да восені кожную пятніцу
ўвечары будуць чутны тры залпы гармат. Цырымоніі адбываюцца на
Ратушнай плошчы ў Коўна.
Новыя выданні – Belarusian Political Science Review, а таксама чацвёрты том матэрыялаў Міжнароднага кангрэса даследчыкаў Беларусі.
Напрыканцы 2014 года выйшаў другі нумар часопіса Belarusian Political Science Review, а таксама чацвёрты том матэрыялаў Міжнароднага кангрэса даследчыкаў Беларусі. Выданні сталі вынікам супрацоўніцтва Інстытута “Палітычная сфера” (Беларусь), Інстытута ВКЛ, а таксама іншых партнёраў.
Call for papers: канферэнцыя “Аднаўленне гісторыі: палітыка памяці ў Цэнтральна-Ўсходняй Еўропе”
У рамках канферэнцыі, якая пройдзе 3-4 траўня 2013 г. ў Мінску,
плануецца прааналізаваць асноўныя стратэгіі рэалізацыі гістарычнай
палітыкі ў краінах Цэнтральна-Ўсходняй Еўропы, выявіць спецыфічныя і
агульныя рысы працы з мінулым, разгледзець узаемасувязь палітыкі
памяці з шырэйшым кантэкстам палітычных і культурных трансфармацый
посткамуністычных краін.
Задача канферэнцыі – стварыць пляцоўку для ўзаемадзеяння акадэмічных і
экспертных супольнасцей рэгіёна для глыбейшага разумення і
даследавання праблем палітыкі памяці ва Ўсходняй Еўропе.
Для аналізу і разгляду на дадзенай канферэнцыі будуць вылучаныя
наступныя тры ключавыя тэмы, якія уяўляюцца нам найбольш значнымі
для асэнсавання агульнай культурна-гістарычнай спадчыны рэгіёна:
1. Агульнае мінулае ці аўтаномныя нацыянальныя гісторыі? Памяць пра
ВКЛ і Рэч Паспалітую ў дзяржавах Цэнтральна-Ўсходняй Еўропы.
2. Кастусь Каліноўскі і паўстанне 1863 г.: канфлікт інтэрпрэтацый праз 150
гадоў.
3. Камуністычнае мінулае: паміж пераадоленнем і рэстаўрацыяй у
посткамуністычных краінах.
Асноўныя арганізатары:
Інстытут “Палітычная сфера” (Беларусь)
Інстытут ВКЛ (Літва)
Instytut Polski (Мінск, Беларусь)
Універсітэт Вітаўта Вялікага (Літва)
Працоўныя мовы канферэнцыі – беларуская, руская, англійская, польская.
Прыблізны лік удзельнікаў – 40 чалавек.
Тэхнічныя дэталі
Для ўдзелу ў Міжнароднай канферэнцыі неабходна даслаць:
1) CV на любой працоўнай мове
2) тэзісы выступу памерам у 2-3 тыс. друкаваных знакаў на любой
працоўнай мове
3) таксама ў лісце неабходна паведаміць, ці патрабуецца візавая
падтрымка.
Заяўку неабходна даслаць на адрас info @ palityka.org да 3 сакавіка 2013
года.
Арганізатары хадайнічаюць пра атрыманне бясплатнай беларускай візы.
У асобных выпадках можа быць разгледжана пытанне пра кампенсацыю
выдаткаў на пражыванне і праезд.
Прэмія Ю. Бардаха
3 мая 2014 года ў Сейнах адбылося ўручэнне Прэміі імя Юліуша
Бардаха. Галоўную ўзнагароду атрымаў Мікалай Таркоўскі з
Гданьска за працу “Віленская адвакатура ў 1918-1939 гг.” Другое
месца заняла праца Міколы Геныка “За нашу і вашу свабоду”:
польска-украінскае замірэнне ў перыяд біпалярнасці”. Трэцяе месца
здабыла Алена Падалінская з Мінску за працу “Рэцэпцыя
арыстацелізму ў філасофскай і грамадска-палітычнай думцы
Беларусі эпохі Адраджэння”. Ва ў урачыстасцях прыняла ўдзел
удава Юліуша Бардаха Ванда Бардах, консул Літвы ў Сейнах Віда
Багданавічынэ, заснавальнікі Інстытута Вялікага Княства Літоўскага
і сябры Навуковай Рады (Егідыюс Александравічус, Антанас
Кулакаўскас, Ян Маліцкі, Дарыуш Шпопер, Малгажата Чыжэўска,
Андрэй Казакевіч і інш.).
Узнагародзілі Яна Маліцкага
Адзін з заснавальнікаў Інстытуту Вялікага Княства Літоўскага, дырэктар
Інстытуту Усходняй Еўропы Варшаўскага Універсітэту Ян Маліцкі 3 снежня
2013 года стаў лаўрэатам прэстыжнай Узнагароды імя Ежы Гедройца. Гэтая
ганаровая ўзнагарода надаецца тыднёвікам “Рэч Паспалітая” за дасягненні
ў развіцці сяброўства, узаемнага разумення і супрацоўніцтва ў Цэнтральнай
і Усходняй Еўропе.
Лекцыя літоўскага навукоўца ў Вроцлаве
3 снежня 2013 года ва Вроцлаве адбылася публічная лекцыя прафесара
Універсітэта Вітаўта Вялікага Антанаса Кулакаускаса “Сучасная Літва і
польскае пытанне”. Гэта была першая “Вроцлаўска-Ковенская” лекцыя. У
рамках праекту літоўскія навукоўцы прыязджаюць з публічнымі лекцыямі
ва Вроцлаў, а польскія – у Коўна. Арганізатарамі праекта выступілі Цэнтр
Чэслава Мілаша, Інстытут Вялікага Княства Літоўскага і Калегіум Усходняй
Еўропы.